Føroya landsstýri og Reyði Krossur lata 500.000 kr. í neyðhjálp til Nepal

Eftir ógvusligu vatnflóðina í Nepal 26. august lata Reyði Krossur Føroya og Føroya landsstýri í felag 500.000 krónur í neyðhjálp til fólk, sum eru rakt av vanlukkuni.

Vatnflóðin rakti serliga øki fram við áunum Bhote Koshi og Trishuli í norðara og mið-Nepal, og oyðilegði hús, vegir, brýr, el- og vatnveiting, skúlar, heilsutænastur og annað týðandi undirstøðukervi.

Stuðulin fer til bráðfeingis neyðhjálp til fólk, sum eru rakt av flóðini. Átakið fevnir millum annað um leiting og bjarging, fyrstuhjálp, fyribils skjól, neyðsynjarvørur, mat, reint drekkivatn, reinføri, heilsuhjálp, sálarligan stuðul og peningastuðul til rakt húski.

Sambært nýggjastu almennu fráboðanunum úr Nepal eru fleiri enn 900 fólk funnin deyð, og umleið 4.200 fólk eru framvegis saknað. Tølini kunnu framvegis broytast, so hvørt bjargingarlið fáa betri atgongd til tey raktu økini og fáa skrásett støðuna nærri.

Stuðulin verður latin gjøgnum Reyða Kross-rørsluna og fer til neyðhjálpararbeiðið hjá Nepalska Reyða Krossi, sum veitir hjálp á staðnum, har tørvurin er størstur.

Uttanríkis- og fiskimálaráðið